Mayor Labella nagpatawag ug meeting mahitungod sa pagpalawom sa upat ka dakong sapa sa syudad

Metro News

Cebu City – Buot ni Cebu City Mayor Edgardo Labella nga mahan-ay na ang tanang preparasyon alang sa ipahigayon nga halapad nga paglimpyo ug pagpalawom sa upat ka dagkong suba ug mga sapa aron mahibalik ang kanhi kaanindot sa kasapaan.

Nunot niini, mopatawag og panagtigom karong alas 2 sa hapon, lunes, Hulyo 15, si Labella aron susihon ang mga barangay nga gilagbasan sa upat ka dagkong sapa nga nahimutang sa sentro sa siyudad.

Lakip sa ipatawag ni Labella ang City Environment and Natural Resources Office, Department of Public Works and Highways, Department of Engineering and Public Works, Management Information and Computer System, Department of Public Services ug uban pa.

Gitug-an sa mayor nga dunganon og limpyo ang mahiga creek, parian ug tejero creek, guadalupe river ug bulacao river nga maoy nagsilbi nga agianan sa tubig baha paingon sa dagat.

Gawas sa engineering battalion sa Philippine Army, paapilon og limpyo sa mayor ang tanang departamento ug buhatan sa city hall, mga barangay ug modawat sab sila og volunteers.

Nasayran nga dunay tahasan si labella matag departamento ug opisina nga molista sa mga pangalan sa niapil sanglit kadtong dili mosanong posibleng silotan subay sa mando sa kalapasan sa balaud. (DYARNewsCenter/GO)

Leave a Reply

Your email address will not be published. Required fields are marked *