12 ka barangay sa dakbayan sa Sugbo ipaubos sa strict lockdown

Metro News

Cebu City – Ipaubos sa strict lockdown ang dose ka barangay sa dakbayan sa sugbo nga adunay taas nga kaso sa covid-19.

Suma kang Police Regional Office (PRO) 7 Chief Brigadier General Albert Ignatius Ferro, ilang hatagan og igo nga pagtagad ang maong mga barangay diin butangan nila og mas daghang security personnel aron mapatuman nga mas estrikto ang mga protocol sa ECQ.

Giklaro sa kapulisan nga ang tibuok Cebu City maisip nang gi-lockdown human kini gipailawom sa enhanced community quarantine (ECQ) sugod niadtong Hunyo 16, apan ang 12 ka kabarangay ilabina ang mga sityo niini, maoy hugtan og bantay sa kapulisan.

Giila ni Environment Secretary Roy Cimatu ang 12 ka mga barangay nga dunay taas nga mga kaso sa covid-19 mao ang Sambag 1, Sambag 2, Kamputhaw, Mabolo, Basak San Nicolas, Guadalupe, Duljo Fatima, Lahug, Tinago, Tisa, Ermita, ug Tejero.

Si Cimatu gipadala ni Presidente Rodrigo Duterte sa dakbayan sa Sugbo aron maoy mosusi nganong paspas ang pagsaka sa mga kaso sa coronavirus disease (covid-19) sa dakbayan.

Kahinumduman nga gikanselar ni Mayor Edgardo Labella ang tanang 250,000 ka quarantine passes diin walay bisan kinsa nga makagawas sa balay gawas lang niadtong exempted ug kadtong mamalit og mga nag-unang panginahanglan, sama sa pagkaon ug tambal. (DYARNewsCenter/BC)

Leave a Reply

Your email address will not be published. Required fields are marked *