Citizens Arrest gimando ni Lapu Lapu City Mayor Chan alang sa mga tawong dili magsul-ob og face mask

Metro News

Cebu City – Mamahimo na nga makadakop ang bisan kinsang lumolupyo sa dakbayan sa Lapu-Lapu alang sa mga tawong makalapas sa mga quarantine protocol.

Kini kon hingpit na nga maamendahan ang ordinansa sa siyudad nga nagsilot sa mga tawo nga di magsul-ob og face mask nga mogawas sa ilang panimalay.

Kini ang gibutyag ni Mayor Junard Chan atol sa iyang State of the City Address kon (SOCA) kagahapon diin nipadayag sa iyang kagustohan sa paggamit sa citizen’s arrest batok sa mga molapas sa mga protocol, labina sa pagsul-og mask.

Kalabot niini giawhag sa mayor ang konseho sa pag-amendar sa ordinansa alang sa maong katoyuan.

Base sa City Ordinance 15-084-2020, nga napasar niadtong tunga-tunga sa hunyo, ang tawo nga madakpan sa unang higayon pahimangnoan lang una, sa ikaduhang higayon sa paglapas pamultahon og P1,000 samtang P3,000 ang multa alang sa ikatulong higayon.

Tungod niini buot ni Chan hatagan og incentive ang makadakop pinaagi sa pagtunga sa multa diin bahinon sa syudad ug ang makadakop ang multa sa madakpan.

Nagtuo ang mayor nga pinaagi sa gahom sa citizen’s arrest magmatngon na ang mga tawo sa paggawas sa balay nga di magsul-ob og mask.

Dugang sa ni Chan gikinahanglan ang estriktong pagpatuman sa mga health protocol aron batukan ang covid-19. (DYARNewsCenter/BC)

Leave a Reply

Your email address will not be published. Required fields are marked *