Border Checkpoint sa dakbayan sa Sugbo gi-ablihan na

Metro News

Cebu City – Giwagtang na sa Cebu City government ang border checkpoint ug gi-ablihan na ang mga utlanan sa Mandaue City ug Talisay City, sugod kagahapon.

Kini human nga misanong si Mayor Edgardo Labella sa rekomendasyon ni Alma Casimero, pangulo sa Cebu City Transportation Office (CCTO), nga hamugaway na nga makaagi ang sakyanan gikan sa Talisay paingon sa Cebu City ug Mandaue.

Kalabot niini, makaagi na ang mga sakyanan gikan sa Mandaue nga mosubay sa Serging Osmeña Avenue sa North Reclamation Area.

Gi-ablihan na usab ang General Maxilom Extension duol sa Robinson Galleria ug gitugotan na sa pag-right turn ug left turn ang mga sakyanan sa maong dalan.

Abli na usab ang Dalan v. Sotto paingon ug gikan sa Pier 3 nga usa sa mga kritikal area gumikan sa kadaghan sa mga sakyanan.

Nagpaabot pa usab ang CCTO sa rekomendasyon sa Philippine National Police alang sa pag-abli og dugang kalsada. (DYARNewsCenter/BC)

Leave a Reply

Your email address will not be published. Required fields are marked *